பூ ஒன்றை வாரம் ஒருமுறையாவது சமைத்து சாப்பிடலாம் என்று சொன்னால், சட்டென்று பூவை எப்படி சமைப்பது என்ற கேள்வி நம் மனதில் எழக் கூடும். ஆனால், அது வாழைப்பூ என்று உங்களுக்கு நினைவூட்டினால் போதும், அதில் எத்தனை ரகமான உணவுகளை செய்ய முடியும் என்று பெரிய பட்டியலே போட்டு விடுவீர்கள்.
அதிலும் வாழைப்பூ வடை என்றால் தமிழர்களுக்கு கொள்ளை பிரியம். அதனை முருங்கை கீரையுடன் சேர்த்து கூட்டு வைத்து சாப்பிடுபவர்களும் உண்டு. தமிழகம் மட்டுமல்ல, இந்தியாவின் பிற மாநிலங்களிலும் வாழைப்பூ சிறந்த உணவாக இருக்கிறது.
மேற்கு வங்கம், பீகார் போன்ற மாநிலங்களில் வாழைப்பூவில் பக்கோடா செய்து சாப்பிடுகின்றனர். இன்னும் பல மாநிலங்களில் வாழைப்பூ சூப் அருந்தும் வழக்கம் இருக்கிறது.
எண்ணற்ற பலன்கள் :
பொதுவாக பாஸ்பரஸ், கால்சியம், பொட்டாசியம் மற்றும் இரும்புச்சத்து போன்றவை வாழைப்பூவில் நிறைவாக கிடைக்கின்றன. இவை அனைத்துமே நம் உடல் நலனுக்கு அத்தியாவசிய தேவையாக இருப்பவை. அதுபோக வாழைப்பூவை சாப்பிடுவதால் சிறுநீரகக் கல் பிரச்னை மற்றும் யூரிக் அமில பிரச்னையை தீர்க்க உதவும் என்று குறிப்பிடுகின்றனர். பிற பலன்களை விரிவாகப் பார்க்கலாம்.
கரையத்தக்க நார்ச்சத்து மற்றும் கரையா நார்ச்சத்து ஆகிய இரண்டு வகை நார்ச்சத்துக்கள் இதில் உண்டு. இவை நம் மெடபாலிச நடவடிக்கையை ஊக்குவிப்பவை. அதேபோல செரிமான சக்தியை மேம்படுத்தும். தேவையற்ற கழிவுகளை மலம் வழியாக வெளியேற்றும்.
பொட்டாசியம், கால்சியம், வைட்டமின் ஏ, வைட்டமின் சி மற்றும் வைட்டமின் இ போன்ற சத்துக்கள் இருப்பதால் மூட்டு வலி குறையும் மற்றும் எலும்புகளின் அடர்த்தி மேம்படும்.
எலும்புகளுக்கு மத்தியில் சிதைவு ஏற்பட்டால் அதில் யூரிக் அமிலம் தங்கும். அழற்சிக்கு எதிரான பண்புகள் கொண்ட வாழைப்பூ சாப்பிட்டால் இதில் இருந்து தீர்வு கிடைக்கும் மற்றும் வலி இருக்காது.
வாழைப்பூ பொரியல் செய்யும் முறை:
வாழைப்பூவில் உள்ள வெள்ளை நிற வெளிப்புறத் தோல் மற்றும் நரம்புகளை நீக்கி, சிறு, சிறு துண்டுகளாக நறுக்கிக் கொள்ளவும். அதை தண்ணீரில் வேக வைத்து வடித்து எடுத்துக் கொள்ள வேண்டும்.
மற்றொரு கடாயில் 50 மில்லி அளவுக்கு எண்ணெய் ஊற்றி, அது காய்ந்ததும் கடுகு, உளுந்தம்பருப்பு சேர்த்து பொறிக்கவும்.
பிறகு வர மிளகாய் 5, 6 துண்டுகளை எண்ணெயில் வதக்கவும். அதனுடன் கறிவேப்பிலை சேர்த்துக் கொள்ளலாம். விரும்பினால் சிறிதளவு சீரகம் சேர்த்துக் கொள்ளலாம்.
பிறகு நறுக்கிய சின்ன வெங்காயம் சேர்த்து வதக்கவும். ஏற்கனவே வேக வைத்த வாழைப்பூ சேர்த்து வதக்கவும்.
மஞ்சள் தூள், உப்பு ஆகியவை சேர்த்து 5 நிமிடம் வேக வைக்கவும். தண்ணீர் வற்றிய பிறகு கீழே இறக்கி பரிமாறலாம்.
🔻 🔻 🔻
0 Comments:
Post a Comment