Google Pay, Phonepe அடிக்கடி யூஸ் பண்றீங்களா..? இனிமே கூடுதல் கட்டணம் தான்..? வெளியான முக்கிய அப்டேட்!

 ரூ.2000 வரையிலான டிஜிட்டல் பண பரிவர்த்தனைகளுக்கு 18% வரை ஜிஎஸ்டி விதிக்கப்படலாம் என தகவல் வெளியாகியுள்ளது.

நிதி அமைச்சர் நிர்மலா சீதாராமன் தலைமையில் வரும் செப்டம்பர் 9ஆம் தேதி 54ஆவது ஜிஎஸ்டி கவுன்சில் கூட்டம் நடைபெற உள்ளது.  இந்த கூட்டத்தில், கூகுள் பே, போன் பே போன்ற இடைத்தரக நிறுவனங்கள் மூலம் ரூ.2000 வரை மக்கள் மேற்கொள்ளும் டிஜிட்டல் பணப்பரிவர்த்தனைகளுக்கு அந்த இடைத்தரகர்களிடம் (கூகுள் பே, போன் பே போன்றவை) ஜிஎஸ்டி வரியை விதிக்கலாம் என தகவல் வெளியாகியுள்ளது.


நாட்டில் நடைபெறும் டிஜிட்டல் பண பரிவர்த்தனைகளில், ரூ.2000 கீழ் உள்ள டிஜிட்டல் பரிவர்த்தனைகள் தான் அதிகம் என மத்திய அரசு ஏற்கனவே தெரிவித்திருந்தது. இந்நிலையில் தான் வரும் ஜிஎஸ்டி கூட்டத்தில் இந்த முடிவு எடுக்கப்படலாம் என கூறப்பட்டுள்ளது.
அப்படி வரியை விதித்தால், வாடிக்கையாளர்களிடமும் இந்த நிறுவனங்கள் வரி வசூலிக்கலாம் என எதிர்பார்க்கப்படுகிறது. ஏற்கனவே மொபைல் ரீச்சார்ஜ், மற்ற பில் கட்டணங்களுக்கு வரியை இந்த நிறுவனங்கள் வசூலிக்கிறது. இந்த வரி ஒருவேளை விதிக்கப்பட்டால், அதைப் பொறுத்தே அந்த நிறுவனங்கள் முடிவெடுக்கலாம் என கூறப்படுகிறது.

ஏன் இந்த வரி?:

ஜிஎஸ்டி பிட்மென்ட் கமிட்டியின் பரிந்துரைகள் படி, இந்த நிறுவனங்கள் இடைத்தரகர்களாகவே செயல்படுகின்றன. இந்த நிறுவனங்கள் வங்கிகள் கிடையாது. ஜிஎஸ்டி விதியின்படி, இடைத்தரகராக உள்ள நிறுவனங்களிடம் வரி விதிக்கப்படும். எனவே இந்த ஆண்டு முதல் ரூ.2000க்கு குறைவான பரிவர்த்தனைகளுக்கும் வரி விதிக்கப்படலாம் என எதிர்பார்க்கப்படுகிறது.
இதுவரை ஏன் வரி இல்லை?:

மத்திய அரசு டிஜிட்டல் பணப்பரிவர்த்தனைகளை மக்களிடம் ஊக்குவிக்க முயன்ற போது, இந்த நிறுவனங்களிடம், ரூ.2000 குறைவான பரிவர்த்தனை நடைபெற்றால் வரி இல்லை என தெரிவித்தது. இதனால், இந்த நிறுவனங்கள் வாடிக்கையாளர்களிடமும் வரியை வசூலிக்காமல் சேவை செய்து வந்தது. ஆனால் தற்போது நாட்டில் பெரும்பான்மையினர் டிஜிட்டல் பணப்பரிவர்த்தனைகளை மேற்கொள்வதால், இந்த வரியை அமல்படுத்தப்போவதாக கூறப்படுகிறது.

🔻🔻🔻
Click here to join WhatsApp group for Daily employment news

Click here to join TNkalvinews whatsapp group

Click here to join TNPSC STUDY whatsapp group

Read More

Expiry Date, Best Before மற்றும் Use By தேதியின்படி பொருட்களை பயன்படுத்துவதற்கு என்ன வித்தியாசம்? - 99 % பேருக்கு தெரியாது!

நீங்கள் எப்போதாவது பொருட்களில் காலாவதி தேதி உள்ளிட்ட தகவல்கள் எழுதியிருப்பதை பார்த்திருக்கிறீர்களா?. இல்லை என்றால் முதலில் அதை தான் நீங்கள் பார்க்க வேண்டும், ஏனென்றால் நாம் பயன்படுத்தும் அனைத்து பொருட்களின் பாக்கெட்டுகள் மீது தயாரிக்கப்பட்ட தேதி, காலாவதியாகும் தேதி உள்ளிட்டவை எழுதப்பட்டிருக்கும்.

காலாவதி தேதி (expiry date) என்பது அனைவரும் புரிந்துகொள்ளத்தக்கது. ஆனால் பெரும்பாலான மக்களுக்கு best before மற்றும் use by குறித்து அர்த்தம் தெரியாது. இதுகுறித்து உங்களுக்கு குழப்பம் இருந்தால் கவலைப்பட வேண்டாம். இதை பற்றி தான் இன்று நாம் பார்க்கப் போகிறோம்.

பொதுவாக, காலாவதி தேதி (expiry date), best before மற்றும் use by ஆகியவைக்கு ஒரே அர்த்தம் என மக்கள் கருதுகிறார்கள். ஆனால் அது உண்மை இல்லை. மூன்றுக்கும் வெவ்வேறு அர்த்தங்கள் உள்ளன. உரிய தகவல் இல்லாததால், சில நேரங்களில் பயன்படுத்த தகுதியற்றதையும் நாம் பயன்படுத்துகிறோம். குறிப்பாக மருந்துகள், ஒப்பனை பொருட்கள் மற்றும் உணவு பொருட்கள். இந்த மூன்றை பற்றி விரிவாக தெரிந்து கொண்டால், நீங்கள் மீண்டும் இந்த தவறை செய்ய மாட்டீர்கள். ஆகையால் மூன்றுக்கும் இடையே உள்ள வேறுபாடு என்ன என்பதை அறிந்து கொள்வோம்.

காலாவதி தேதி (expiry date) என்ன?

காலாவதி தேதி என்பது, குறிப்பிட்ட தேதிக்கு பின்பு அந்த தயாரிப்பைப் பயன்படுத்துவது உடல்நலத்திற்கு ஆபத்தை விளைவிக்கும் என்பதை உணர்த்துவதாகும். அந்த பொருளை, அதில் அச்சிடப்பட்ட தேதிக்கு பிறகு பயன்படுத்த முடியாது. ஏனெனில் அதில் பாக்டீரியா அல்லது பிற தீங்கு விளைவிக்கும் பொருட்கள் வளரக்கூடும். வழக்கமாக, 2 முதல் 3 ஆண்டுகளுக்குப் பிறகு காலாவதியாகும் மருந்துகள் அல்லது அத்தகைய தயாரிப்புகளில் காலாவதி தேதி எழுதப்பட்டுள்ளன.

எடுத்துக்காட்டாக, ஃபவுண்டேஷன்(Foundation) அல்லது ஐலைனர்(Eyeliner) போன்ற அழகு சாதனப் பொருட்களை அவற்றின் காலாவதி தேதிக்குப் பிறகு பயன்படுத்தினால், சருமத்தில் ஒவ்வாமை, தடிப்புகள் அல்லது பிற பிரச்சனைகள் ஏற்படலாம். இதுவே உணவுப் பொருட்களுக்கும் பொருந்தும். உதாரணமாக, பால் பாக்கெட்டில் எழுதப்பட்ட காலாவதி தேதிக்குப் பிறகு நீங்கள் அந்த பாலை உட்கொண்டால் வயிற்று பிரச்சனைகளை சந்திக்க நேரிடும்.

முன் சிறந்தது (Best Before) என்பதன் பொருள் என்ன?

முன் சிறந்தது (Best Before) என்பது அந்த தேதிக்குப் பிறகு தயாரிப்பு கெட்டுவிடும் என்று அர்த்தமல்ல. இந்த தேதிக்குள் தயாரிப்பு அதன் சிறந்த சுவை, அமைப்பு மற்றும் தரத்தில் இருக்கும் என்று அர்த்தம். இந்தத் தேதிக்குப் பிறகும் தயாரிப்பு பாதுகாப்பாக இருக்கலாம். ஆனால் அதன் தரம் சிறிது குறையலாம்.உதாரணமாக, ஒரு சாக்லேட்டில் “Best Before” என்று எழுதப்பட்டிருந்தால், அந்த தேதிக்குள் சாக்லேட் அதன் சிறந்த சுவை மற்றும் அமைப்புடன் இருக்கும் என்று அர்த்தம். இருப்பினும், அதன் பிறகும் நீங்கள் அதை சாப்பிடலாம். ஆனால் அதன் சுவை சிறிது மாறலாம். ஆனால் எந்த உணவுப் பொருட்களிலும் காலாவதி தேதி எழுதப்பட்டிருந்தால் அந்த தேதிக்குப் பிறகு அதை உட்கொள்ளக் கூடாது.

Use By date என்றால் என்ன?

தேதியின்படி பயன்படுத்துதல்(Use by date) என்பது, அதை உட்கொள்ள அல்லது பயன்படுத்துவதற்கான கடைசி தேதியாகும். இதன் பொருள், இந்த தேதிக்குள் தயாரிப்பு பயன்படுத்தப்பட வேண்டும். அதன் பிறகு அந்த பொருள் இனி பாதுகாப்பாக இருக்காது. இது ஒரு வகையில் காலாவதி தேதி போன்றது. குறிப்பாக புதிய உணவுப் பொருட்கள் மற்றும் கெட்டுப்போகும் பொருட்களில், ‘use by’ date மிகவும் முக்கியமானது.

எடுத்துக்காட்டாக, உணவு பொருள் பாக்கெட்டில் “use by” என்று எழுதப்பட்டிருந்தால், அந்த தேதிக்குப் பிறகு அதை உட்கொள்வது உடல்நலப் பிரச்சினைகளை ஏற்படுத்தும் என அர்த்தம். இதேபோல், ஒப்பனைப் பொருட்களில் (makeup products) எழுதப்பட்டிருந்தால், அந்த தேதிக்குப் பிறகு அதைப் பயன்படுத்துவது உங்கள் சருமத்திற்கு தீங்கு விளைவிக்கும்.

எந்த தயாரிப்பில் என்ன பார்க்க வேண்டும்?

ஒப்பனை பொருட்கள் (makeup products): இதில், நீங்கள் காலாவதி தேதி மற்றும் பொருளின் பயன்படுத்தப்படும் கடைசி தேதியை(Use by date) பார்க்க வேண்டும். நீங்கள் அதை குறிப்பிட்ட தேதிக்குப் பிறகும் பயன்படுத்தினால், அதன் தரம் சிறிது குறையலாம். ஆனால் காலாவதியான பிறகு அதைப் பயன்படுத்துவது சரும பிரச்சனைகளை ஏற்படுத்தும்.

உணவுப் பொருட்கள்: உணவுப் பொருட்களில் (Best before) என்பது அந்தத் தேதி வரை அதன் சுவை மற்றும் தரம் மிகச் சிறந்ததாக இருக்கும். அதே சமயம் அந்தத் தேதிக்குப் பிறகு அதை சாப்பிடுவது உங்கள் ஆரோக்கியத்திற்கு தீங்கு விளைவிக்கும்.
மேலே, கூறப்பட்ட தகவல்கள் அயர்லாந்தின் உணவுப் பாதுகாப்பு ஆணையம் (Food Safety Authority of Ireland), கனெக்டிகட் பல்கலைக்கழக விரிவாக்க வெளியீடுகள்(University of Connecticut Extension Publications), கனேடிய உணவுப் பாதுகாப்பு நிறுவனம் (the Canadian Institute of Food Safety,) மற்றும் ஐரோப்பிய ஒன்றியத்தின் உணவுப் பாதுகாப்பு மற்றும் லேபிளிங் அரசாங்கத் துறைகள்(the European Union’s Food Safety and Labelling Government Department) உட்பட பல்வேறு ஆதாரங்களில் இருந்து எடுக்கப்பட்டது. இது தவிர, சில சுகாதார வலைத்தளங்களிலும் இதே போன்ற தகவல்கள் இடம்பெற்றுள்ளன.

🔻🔻🔻
Click here to join WhatsApp group for Daily employment news

Click here to join TNkalvinews whatsapp group

Click here to join TNPSC STUDY whatsapp group

Read More

பேக்கரி பொருட்கள் செய்ய விருப்பமா ..? அரசு சான்றிதழோடு பயிற்சி பெற சூப்பர் வாய்ப்பு...

 தமிழ்நாடு அரசின் தொழில் முனைவோர் மேம்பாடு மற்றும் புத்தாக்க நிறுவனம் ( entrepreneurship development and innovation institute) புதிய தொழில்முனைவோர்களை உருவாக்க பல்வேறு நலத்திட்டங்களை செயல்படுத்தி வருகிறது. தற்போது அதில் ஒருபகுதியாக பேக்கரி பொருட்கள் தயாரிப்பு தொடர்பான பயிற்சி அளிக்கப்பட உள்ளது.

வரும் ஆகஸ்ட் 7 ம் தேதியில் இருந்து 9 ம் தேதி வரையிலான மூன்று நாட்களுக்கு காலை 9.30 ல் இருந்து மாலை 6 மணி வரை , சென்னையில் உள்ள entrepreneurship development and innovation institute ல் நடைபெற உள்ளது. இந்த நிகழ்வில் பேக்கரி பொருட்களை எப்படி தயாரிப்பது, அதற்கு என்னென்ன பொருட்கள் தேவை, என்னென்ன மிஷின்கள் தேவை, எப்படி பேக்கிங் செய்வது, எப்படி லேபிளிங் செய்வது , விலை எப்படி நிர்ணயம் செய்வது, மார்க்கெட்டிங் தொடர்பான பயிற்சிகள் அளிக்கப்பட உள்ளது.
இதில் குறைந்தது பத்தாம் வகுப்பு தேர்ச்சி பெற்ற 18 வயது பூர்த்தி அடைந்த ஆண் பெண் இருவருமே பங்கு பெறலாம். இதில் கலந்து கொள்ள பயிற்சி கட்டணமாக 5000 ரூபாய் செலுத்த வேண்டும். இதற்கு முன்பதிவு செய்ய www.editn.in என்ற இணையதளத்தில் சென்று முன்பதிவு செய்து கொள்ளலாம்.  மேலும் சந்தேகங்களுக்கு 8668102600/70101430022 என்ற எண்களை தொடர்பு கொள்ளலாம்.

🔻🔻🔻
Click here to join WhatsApp group for Daily employment news

Click here to join TNkalvinews whatsapp group

Click here to join TNPSC STUDY whatsapp group

Read More

பேக்கரி பொருட்கள் தயாரிப்புக்கான சான்றிதழுடன் 3 நாள் இலவச பயிற்சி: சென்னையில் அரசு அறிவிப்பு

 

சென்னையில் தமிழக அரசின் தொழில் முனைவோர் மேம்பாடு மற்றும் புத்தாக்க நிறுவனம் சார்பில் ஆண், பெண்களுக்கு பேக்கரி பொருட்கள் தயாரிப்பதற்கான 3 நாட்கள் பயிற்சி வழங்கப்பட உள்ளது.

இதில் பங்கேற்பவர்களுக்கு சான்றிதழ் வழங்கப்படும் நிலையில் எப்படி விண்ணப்பித்து பயிற்சியில் இணைவது என்பது பற்றி இங்கு பார்ப்போம்.

மத்திய, மாநில அரசு சார்பில் ஆண், பெண் என்று இருதரப்பினரையும் தொழில் முனைவோராக்கும் நோக்கில் பல்வேறு சிறப்பு திட்டங்கள் செயல்படுத்தப்பட்டு வருகின்றன.

தமிழகத்தில் மாநில அரசு சார்பில் தொழில் முனைவோர் மேம்பாடு மற்றும் புத்தாக்க நிறுவனம் சார்பில் பல்வேறு தொழில் சார்ந்த வழிக்காட்டுதல்கள், பயிற்சிகள் பொதுமக்களுக்கு வழங்கப்பட்டு வருகிறது.

அந்த வகையில் தான் ஆண், பெண்கள் என இருவருக்கும் பேக்கரி பொருட்கள் தயாரிப்பதற்கான 3 நாள் பயிற்சி தற்போது அளிக்கப்பட உள்ளது. இதுதொடர்பாக தமிழக அரசு வெளியிட்டுள்ள செய்திக்குறிப்பில் கூறப்பட்டுள்ளது: தமிழக அரசின் தொழில் முனைவோர் மேம்பாடு மற்றும் புத்தாக்க நிறுவனம் சென்னையில் 3 நாட்கள் தொழில் முனைவோர் மேம்பாட்டு திட்டத்தின் கீழ் பேக்கரி பொருட்கள் தயாரிக்கும் பயிற்சி வழங்க உள்ளது. இந்த பயிற்சி என்பது 26.06.2024 முதல் 28.06.2024 வரை 3 நாட்கள் தினமும் காலை 9.30 மணி முதல் மாலை 6 மணி வரை நடைபெற உள்ளது.

இப்பயிற்சியில் பேக்கரி பொருட்களின் மூலப்பொருள், பிராண்ட் போன்றவற்றால் கிடைக்கும் தன்மை, கருவிகள் மற்றும் உபகரணங்கள், இயந்திரங்கள் பற்றி விளக்கம் அளிக்கப்படும். மேலும் ஹைதராபாத் கராச்சி பிஸ்கட், ஜெர்ரா உப்பு பிஸ்கட், இனிப்பு குக்கீகள், ஈஸ்ட் புளிக்க வைக்கப்பட்ட பாம்பே பன், இனிப்பு ரொட்டி, கிரீம் பன், பழ ரஸ்க், பப்ஸ் வகைகள், கேக் வகைகள் எப்படி தயாரிப்பது பற்றி இப்பயிற்சியில் விளக்குவார்கள்.

மேலும் தயாரிப்பு சந்தைப்படுத்துதலின் அம்சங்கள் பேக்கிங் லேபிளிங் மற்றும் அதற்கான விலை வழிமுறைகள் ஆகியன கற்றுத்தரப்படும். அரசு வழங்கும் உதவிகள் மற்றும் மானியங்கள் பற்றியும் விளக்கப்படும். இப்பயிற்சியில் ஆர்வமுள்ள தொழில்முனைவோர் (ஆண்/பெண்) 18 வயதுக்கு மேற்பட்ட குறைந்தபட்ச கல்வித் தகுதியான 10ம் வகுப்புடன் விண்ணப்பிக்கலாம். இப்பயிற்சியில் பங்குபெறும் பயனாளிகளுக்கு குறைந்த வாடகையில் குளிரூட்டப்பட்ட தங்கும் விடுதி உள்ளது. தேவைப்படுவோர் இதற்கு விண்ணப்பித்து பெற்று கொள்ளலாம்.

இப்பயிற்சி பற்றி கூடுதல் விவரங்களை பெற விரும்புவோர் www.editn.in என்ற வலைதளத்தில் தெரிந்து கொள்ளலாம். மேலும் விவரங்களுக்கு அலுவலக வேலை நாட்களில் (திங்கள் முதல் வெள்ளி வரை) காலை 10 மணி முதல் மாலை 5.45 மணி வரை தமிழ்நாடு தொழில் முனைவோர் மேம்பாடு மற்றும் புத்தாக்க நிறுவனம், சிட்கோ தொழிற்பேட்டை, இடிஐஐ அலுவலக சாலை ஈக்காட்டுத்தாங்கல், சென்னை – 600 032 என்ற முகவரியை அணுகலாம். இல்லாவிட்டால் 86681 02600, 70101 43022 என்ற எண்ணை தொடர்பு கொள்ளலாம்” என தெரிவிக்கப்பட்டுள்ளது.

🔻🔻🔻
Click here to join WhatsApp group for Daily employment news

Click here to join TNkalvinews whatsapp group

Click here to join TNPSC STUDY whatsapp group

Read More

ஈரோட்டில் கனராவங்கி கிராமப்புற சுயவேலைவாய்ப்பு பயிற்சி

 

ஈரோடு கனராவங்கி கிராமப்புற சுயவேலைவாய்ப்பு பயிற்சி நிலையத்தின் சார்பாக இலவசமாக A/c , Fridge , Washing Machine மற்றும் வீட்டு உபயோக பொருள்கள் பழுது நீக்குதல் பயிற்சி வழங்கபடவுள்ளது. இந்த பயிற்சி வகுப்பில் ஆண் / பெண் இருபாலரும் கலந்து கொள்ளலாம்.

வருகின்ற 29-04-2024 முதல் 03-06-2024 வரை 30 நாட்கள் இப்பயிற்சி வகுப்புகள் நடைபெற உள்ளது. இந்த வகுப்பில் கலந்து கொள்ளும் நபர்களுக்கு பயிற்சி சீருடை, உணவு உட்பட அனைத்தும் இலவசமாக வழங்கப்படுகிறது. பயிற்சியின் முடிவில் அரசு சான்றிதழ் வழங்கப்படுகிறது. ஈரோடு மாவட்டத்தைச் சேர்ந்தவர்கள் மட்டும் பயிற்சியில் கலந்து கொள்ள அனுமதிக்கப்படுவார்கள்.18 வயதிற்கு மேல் 45 வயதிற்கு உட்பட்டவர்கள் மட்டும் பயிற்சியில் கலந்து கொள்ள அனுமதிக்கப்படுவார்கள்.வறுமை கோட்டிற்கு கீழ் வாழ்பவர்கள் அல்லது நூறு நாள் வேலைத் திட்டத்தில் இருப்பவர்கள் மற்றும் அவர்களின் குடும்ப உறுப்பினர்களும் இப்பயிற்சியில் கலந்து கொள்ளலாம். இந்த பயிற்சி வகுப்புகளுக்கு முன்பதிவு அவசியம்.

முன்பதிவு செய்வதற்கான எண்கள் : 8778323213,  7200650604 0424-2400338

இலவச பயிற்சி முகாம் நடைபெறும் இடம் கனரா வங்கி கிராமப்புற சுய வேலைவாய்ப்பு பயிற்சி நிலையம், ஆஸ்ரம் மெட்ரிக் மேல்நிலைப்பள்ளி வளாகம் 2-ம் தளம், கொல்லம்பாளையம் பைபாஸ் ரோடு, ஈரோடு- 638002 .

🔻🔻🔻

Click here to join Group4 whatsapp group

Click here to join WhatsApp group for Daily employment news

Click here for latest employment news

Read More

Tangedco வின் புதிய செயலி அறிமுகம் – டிச. முதல் அமல்!

 

Tangedco வின் புதிய செயலி அறிமுகம் – டிச. முதல் அமல்!

தமிழ்நாடு உற்பத்தி மற்றும் பகிர்மான கழகத்தின் சார்பில் ஓய்வூதியதாரர்களின் விண்ணப்பங்களை சமர்ப்பிப்பதற்காக புதிய செயலி ஒன்று அறிமுகம் செய்யப்பட்டுள்ளது.

புதிய செயலி அறிமுகம்:

ஓய்வூதியம் பெறும் நபர்கள் ஆண்டுதோறும் தங்கள் வாழ்க்கைச் சான்றிதழை குறிப்பிட்ட கால அவகாசத்திற்குள் சமர்ப்பிக்க வேண்டியது அவசியமாகும். இந்த ஆவணத்தை சமர்ப்பிப்பதன் மூலமாக ஓய்வூதியதாரர் உயிருடன் உள்ளார் என்பதையும் இதில் முறைகேடுகள் ஏதும் நடைபெறவில்லை என்பதும் உறுதிப்படுத்தப்படுகிறது. இந்த நிலையில் தமிழ்நாடு உற்பத்தி மற்றும் பகிர்மான கழகத்தின் தகவல் தொழில்நுட்ப பிரிவின் மென்பொருள் பொறியாளர்கள் தற்போது வாழ்க்கை சான்றிதழை சமர்ப்பிப்பதற்காக ஓய்வூதியதாரர்களுக்கு புதிய செயலி ஒன்றை உருவாக்கியுள்ளனர்.

இதன் மூலமாக ஓய்வூதியதாரர்கள் ஆவணங்களை நேரடியாக சென்று வழங்க வேண்டிய அவசியம் இல்லை. மொபைல் செயலி மூலமாகவே தங்களது வாழ்க்கை சான்றிதழ்களை சமர்ப்பித்து கொள்ளலாம். இதற்கான மொபைல் செயலி வரும் டிசம்பர் மாதம் முதல் அமலுக்கு வரும் என தெரிவிக்கப்பட்டுள்ளது. இதற்கான பயோமெட்ரிக் முறை மூலம் ஓய்வூதியதாரர்கள் தங்களின் விவரங்களை அங்கீகரிக்க வேண்டும்.

🔻🔻🔻

Click here for latest employment news

 Click here to join WhatsApp group for Daily employment news

Read More

நிப்ட்-டீ பயிற்சி மையத்தில் இலவச சணல் பொருள் உற்பத்தி பயிற்சி

 

நிப்ட்-டீ பயிற்சி மையத்தில் இலவச சணல் பொருள் உற்பத்தி பயிற்சி

வேலை வாய்பற்ற இளைஞர், இளம்பெண்களுக்கு, சணல் பொருட்கள் உற்பத்தி பயிற்சி அளிக்க, நிப்ட்-டீ நிட்வேர் பேஷன் இன்ஸ்டிடியூட் முடிவு செய்துள்ளது.திருப்பூர் நிப்ட்-டீ கல்லுாரி மற்றும், மத்திய, மாநில அரசு திட்டங்களில், இலவச பயிற்சி அளிக்கும் மையம், திருப்பூர் ஒழுங்குமுறை விற்பனை கூடத்தில் இயங்கி வருகிறது.

கடந்த, எட்டு ஆண்டுகளாக, 4,000 க்கும் அதிகமான இளைஞர், இளம்பெண்கள் பயிற்சி பெற்று பயனடைந்துள்ளனர்.தமிழக அரசின் திறன் மேம்பாட்டு கழகம், சணல் வாரியம் சார்பில், புதிய தொழில் பயிற்சிகள் விரைவில் துவங்க இருக்கிறது.

வேலை வாய்ப்பற்ற இளைஞர், இளம்பெண்கள், இல்லத்தரசிகள், இப்பயிற்சியில் பங்கேற்கலாம். குறிப்பாக, சணல் பொருட்கள் தயாரிப்பது குறித்து இலவசமாக பயிற்சி பெறலாம்.இதுகுறித்து நிப்ட்-டீ நிட்வேர் பேஷன் இன்ஸ்டிடியூட் மைய பொறுப்பாளர்கள் கூறியதாவது:இலவச குறுகியகால திறன் பயிற்சியில், தையல் பயிற்சியில், எட்டாம் வகுப்புக்கு மேல் பயின்ற, 18 முதல், 45 வயதுக்கு உட்பட்டவர் பங்கேற்கலாம்.

சணல் பொருட்கள் தயாரிப்பு பயிற்சியில், 10ம் வகுப்புக்கு மேல்படித்த, 18 முதல், 35 வயதுக்கு உட்பட்டவர் பங்கேற்கலாம். இலவச பயிற்சி பெறுவோருக்கு, வேலை வாய்ப்பும் உறுதி செய்து கொடுக்கப்படும்.

முதலில், பயிற்சிக்கான சேர்க்கையை முடித்த பிறகே, பயிற்சி துவங்கும் நாள் அறிவிக்கப்படும். மேலும் விவரங்களுக்கு, 88707 25111 என்ற எண்களில் தொடர்பு கொள்ளலாம். இவ்வாறு கூறினர்.

🔻🔻🔻

Click here for latest employment news

 Click here to join WhatsApp group for Daily employment news

Read More

திருச்சியில் தரைக்கடை அமைக்க விருப்பமா..? விண்ணப்பிக்க கடைசி நாள் எப்போது தெரியுமா?

 எதிர்வரும் 2023 ஆம் ஆண்டு தீபாவளி பண்டிகையை முன்னிட்டு திருச்சி மாவட்டம் வட்டாட்சியர் அலுவலகம் முன்புறமுள்ள டவுன் ஹால் மைதானத்தில் தரைக்கடைகள் அமைத்திட விரும்புவோர் வருகின்ற 30.10.2023 தேதிக்குள் விண்ணப்பிக்கலாம் என திருச்சி மாவட்டம் ஆட்சியர் பிரதீப் குமார் அறிவிப்பு.

திருச்சி மாவட்டம் மற்றும் கிழக்கு வட்டம், திருச்சி டவுன். வட்டாட்சியர் அலுவலகம் முன்புறமுள்ள டவுன் ஹால் மைதானத்தில் 2023 ஆம் ஆண்டு தீபாவளி பண்டிகையை முன்னிட்டு தரைக்கடைகள் அமைப்பது தொடர்பாக குற்றங்குறைகளற்ற திட்டவட்டமான ஒழுங்குமுறை உடைய தெளிவான நடைமுறைகள் சென்ற ஆண்டு பின்பற்றப்பட்டது போல் நடப்பு ஆண்டும் நடைமுறைப்படுத்தப்பட உள்ளது. இது ஒவ்வொரு வருடமும் நடைமுறையில் உள்ள திட்டமாகும்.

டவுன் ஹால் மைதானத்தில் பின்வரும் விவரப்படி அ. ஆ. இ பகுதி என பாகுபாடு செய்யப்பட்டு “அ” பகுதியில் 80 சதுர அடி கொண்ட 37 தரைக்கடைகளும், “ஆ” பகுதியில் 80 சதுர அடி கொண்ட 19 தரைக்கடைகளும் “இ” பகுதியில் 80 சதுர அடி கொண்ட 24 தரைக்கடைகளும் அமைத்திட உத்தேசிக்கப்பட்டுள்ளது.

கடை ஒவ்வொன்றும் அனுமதி வழங்கப்படும் நாளிலிருந்து தீபாவளி பண்டிகை முடிவுறும் வரை வியாபாரம் செய்ய அனுமதிக்கப்படும்.

‘அ’ பிரிவு தரைக்கடை ஒன்றுக்கு அனுமதிக் கட்டணம் - ரூ.7,000

‘ஆ’ பிரிவு தரைக்கடை ஒன்றுக்கு அனுமதிக் கட்டணம் - ரூ.6,000

‘இ’ பிரிவு தரைக்கடை ஒன்றுக்கு அனுமதிக் கட்டணம்‌ - ரூ.5,000

தரைக்கடைகள் அமைக்க விரும்பும் நபர்கள் எந்தப் பிரிவு தரைக்கடை வேண்டுமோ அதைத் தங்கள் விண்ணப்பத்தில் குறிப்பிட்டு அதற்கான கட்டணத் தொகையை வருவாய் கோட்டாட்சியர், திருச்சிராப்பள்ளி (Revenue Divisional Officer, Tiruchirappalli ) என்ற பெயரில் வங்கி கேட்பு காசோலையாக (Demand Draft ) எடுத்து விண்ணப்பத்துடன் இணைத்து திருச்சிராப்பள்ளி வருவாய் கோட்டாட்சியர் அவர்களிடம் 30.10.2023 பிற்பகல் 05.45 மணிக்குள் சேர்க்க வேண்டும்.

தரைக்கடைகள் எண்ணிக்கையைவிட மனு செய்தவர்களின் எண்ணிக்கை அதிகமாக இருக்கும் பட்சத்தில் குலுக்கல் முறையில் நபர்கள் தேர்ந்தெடுக்கப்படுவார்கள். முதலில் ‘‘அ’’ பிரிவுக்கு குலுக்கல் முறையில் தேர்வு நடைபெறும். அதில் இடம் கிடைக்காதவர்கள் விரும்பினால் “ஆ” பிரிவுடன் சேர்ந்து குலுக்கல் நடைபெறும். “ஆ” பிரிவில் இடம் கிடைக்காதவர்கள் விரும்பினால் “இ” பிரிவில் சேர்ந்து குலுக்கல் நடத்தப்படும்.

மேற்படி குலுக்கல் நகர வர்த்தக குழு பிரதிநிதிகள், மாவட்ட உபயோகிப்பாளர் சங்க பிரதிநிதிகள் மற்றும் நகர முக்கிய பிரமுகர்கள் முன்னிலையில் திருச்சி, வருவாய் கோட்டாட்சியர் அவர்களால் திருச்சி வருவாய் கோட்டாட்சியர் அலுவலகத்தில் 01.11.2023 அன்று காலை 11.00 மணிக்கு நடத்தப்படும் என திருச்சி மாவட்டம் ஆட்சியர் பிரதீப் குமார் தெரிவித்துள்ளார்.

🔻🔻🔻

Click here for latest employment news

 Click here to join WhatsApp group for Daily employment news

Read More

கிராமப்புறங்களில் நல்ல லாபம் கொடுக்கும் பிஸினஸ் ஐடியாக்கள்… இதையும் கொஞ்சம் பாருங்க…

 கிராமப்புறங்களுக்கு ஏற்பட லாபத்தை அள்ளித் தரும் சில பிஸ்னஸ் ஐடியாக்கள் உள்ளன. அவற்றில் சிலவற்றை பார்க்கலாம்.

டீ ஷாப் : டீ யை விரும்பாதவர்கள் யாரும் இருக்க மாட்டார்கள். ஆட்கள் அதிகம் கூடும் இடங்களில் டீக்கடை வைத்தால் லாபத்தை அள்ளலாம்.

சில்லறை விற்பனை கடை : கிராமப் புறங்களில் மக்கள் மொத்தமாக பொருட்களை வாங்குவதை காட்டிலும் சில்லறைகளில் வாங்குவதற்கே அதிக ஆர்வம் காட்டுவார்கள். சிறிய மளிகை கடைகள், வெற்றிலை பாக்கு மிட்டாய் கடைகள் கணிசமான லாபம் கொடுக்கும்.

பால் விற்பனை – பால் அத்தியாவசிய தேவை என்பதால் இந்த பிஸ்னஸை கவனத்துடன் பார்ப்பவர்களுக்கு லாபம் நிச்சயம். இந்த வேலைக்கு அதிக உழைப்பை கொட்ட வேண்டியது ஏற்படலாம்.

மாவு மில் – இந்த பிஸ்னஸிற்கு முதலீடு அதிகம் தேவை. ஒரு முறை முதலீடு செய்து விட்டால் அதிலிலிருந்து கணிசமான லாபம் தொடர்ந்து வந்து கொண்டே இருக்கும். இதுவும் அத்தியாவசிய தேவை கொண்ட பொருள் என்பதால் கவனத்துடன் வேலை பார்த்தால் லாபம் உறுதி.

மெடிக்கல் ஷாப் – சிட்டி முதல் கிராமம் வரை லாபம் கொடுக்கும் பிஸ்னஸ்களில் இதுவும் ஒன்று. இதன் தேவை நாளுக்கு நாள் அதிகரித்துக் கொண்டே தான் வருமே தவிர குறையாது.

கோழி பண்ணை – கிராமங்களில் அதிக இடம் உடையவர்கள் இந்த பிஸ்னஸை முயற்சிக்கலாம். கொஞ்சம் முன் அனுபவம் அவசியம். சரியான நபர்களை வேலைக்கு வைத்து பார்க்கும் போது லாபத்தை அள்ளலாம்.

எண்ணெய் மில் – தேங்காய், எள், கடலை உள்ளிட்ட கிராமங்களில் விளையும் பொருட்கள் எண்ணெயாக மாற்றப்படுகின்றன. எண்ணெய் மில் இல்லாத இடத்தில் இதனை ஆரம்பிக்கலாம்.

சிப்ஸ் தொழில் – அதிகம் கவனம் பெறாத அதே சமயம் லாபத்தை அள்ளிக் கொடுக்கும் தொழிலில் இதுவும் ஒன்று. உங்கள் மாஸ்டரிக் கைப் பக்குவம் சூப்பர் என்றால் பணம் குவிவது உறுதி.

🔻🔻🔻

Click here for latest employment news

 Click here to join WhatsApp group for Daily employment news

Read More

கண்டண்ட் கிரியேட்டரா நீங்க? இதோ பெங்களூரில் கொட்டிக்கிடக்கும் வேலைவாய்ப்புகள்!

 இந்தியாவில் சமீப ஆண்டுகளாக சோசியல் மீடியா இன்ஃப்ளூயன்சர்கள் மற்றும் கண்டன்ட் கிரியேட்டர்களுக்கான வேலைவாய்ப்புகள் அதிகரித்து வருவதை பார்க்க முடிகிறது. இது சம்மந்தமான வேலைவாய்ப்புகள் மட்டுமே தங்களது தளத்தில் 117 சதவிகிதம் அதிகரித்துள்ளதாக Indeed வலைதளம் கூறுகிறது.

மேலும், இத்தகைய வேலைவாய்ப்பு பதிவுகளை க்ளிக் செய்யும் போக்கும் 75.30 சதவிகிதம் அதிகரித்துள்ளது என இத்தளம் கூறியுள்ளது. இந்தியா முழுவதும் எடுத்துக் கொண்டால், இதுபோன்ற இன்ஃப்ளூயென்சர்கள் மார்கெட்டிங் வேலைகளுக்கான விளம்பரங்கள் பெங்களூரு நகரத்தில்தான் அதிகமாகப் பதிவிடப்படுவதாக சமீபத்தில் எடுக்கப்பட்ட கணக்கெடுப்பில் தெரிய வந்துள்ளது.

இந்தியாவின் இன்ஃப்ளூயன்சர் மார்கெட்டிங் தலைநகரமாக பெங்களூரை அழைக்கிறார்கள். Indeed தளத்தின் தரவுகளை வைத்து பார்க்கும் போது, இன்ஃப்ளூயென்சர் மற்றும் கண்டன்ட் கிரியேட்டர்கள் தொடர்பான வேலைவாய்ப்பு சந்தையில் பெங்களூரு நகரத்தின் பங்கு மட்டுமே 16 சதவிகிதமாகும். 9 மற்றும் 7.5 சதவிகிதங்களைப் பெற்று இதற்கடுத்த இடங்களை டெல்லியும் மும்பையும் பிடித்துள்ளது.

அதேசமயத்தில், ஜெய்பூர், சூரத், இந்தூர் போன்ற நகரங்களில் இன்ஃப்ளூயன்சர் மார்கெட்டிங் பதவிகளுக்கு குறைவான வேலைவாய்ப்புகளே நிலவுகிறது. இந்நகரங்கள் யாவும் ஒரு சதவிகிதத்திற்கும் குறைவான பங்களிப்பையே கொண்டுள்ளன.

ஐடி நிறுவனங்களின் மையமாகவும் பல ஸ்டார்ட் அப் நிறுவனங்கள் இருப்பதாலும் பெங்களூரு நகரம் இதில் முதலிடத்தில் இருப்பது ஒன்றும் ஆச்சர்யம் இல்லை. இதில் நாம் முக்கியமாக பார்க்க வேண்டியது என்னவென்றால், இங்குள்ள நிறுவனங்கள் பலவும் தங்களது வாடிக்கையாளர்களை அதிகரிக்கவும், தங்களது பிராண்டை மக்கள் மனதில் நிலை நிறுத்தவும் அனுபவமும் திறமையும் மிக்க இன்ஃப்ளூயன்சர்களை வேலைக்கு எடுக்கிறார்கள்.

இன்றைய டிஜிட்டல் காலத்தில், வாடிக்கையார்களோடு உரையாடவும் அவர்களை தொடர்பு கொள்ளவும் டிஜிட்டல் தளங்களையே பல நிறுவனங்களும் நம்பியிருக்கின்றன. உண்மையில், இதுவரை நிறுவனங்கள் நுழைய முடியாத இடங்களில் எல்லாம் தங்கள் படைப்புத் திறனை வெளிப்படுத்தி, மிகப்பெரிய தாக்கத்தை இந்த இன்ஃப்ளூயன்சர்கள் ஏற்படுத்துகிறார்கள். இதுவே வேலைவாய்ப்புச் சந்தையில் எதிரொலிக்கிறது.

யாருடைய உதவியும் இல்லாமல் உங்களுடைய முயற்சியினால் வெற்றிகரமான இன்ஃப்ளூயன்சராகவோ அல்லது கண்டண்ட் கிரியேட்டராகவோ நீங்களும் ஆகலாம். எனினும், இதுபோன்ற வேலைகளுக்கு தொழில்முறையாக செய்து வருபவர்களே பெரிய நிறுவனங்கள் தேர்ந்தெடுக்கின்றன என்பதையும் நாம் கவனத்தில் கொள்ள வேண்டும். கண்டண்ட் கிரியேட்டர்களின் தேவை தொடர்ந்து அதிகரித்து வருவதால், எதிர்காலத்திலும் இந்தப் போக்கு தொடரக்கூடும்

இன்று பலரும் இணைய சேவையை பயன்படுத்துகிறார்கள். சாதாரண ஊசி முதல் டிவி, பிரிட்ஜ் வரை வீட்டில் அமர்ந்தபடியே ஆன்லைனில் எளிதாக வாங்குகிறார்கள். ஆகவே இன்ஃப்ளூயன்சர்களை பயன்படுத்தி தங்களுக்கான வாடிக்கையாளர்களை பெற்றுக் கொள்ளலாம் என பல தொழில் நிறுவனங்கள் நினைக்கின்றன.

இதன் காரணமாக அனுபவமும் மக்களை எளிதில் ஈர்க்கக்கூடிய திறமையுள்ள கண்டண்ட் கிரியேட்டர்களுக்கும் இன்ஃப்ளூயென்சர்களுக்குமான தேவை அதிகரித்துள்ளது. நீங்களும் திறமையான கண்டன்ட் கிரியேட்டராகவோ அல்லது இன்ஃப்ளூயென்சராகவோ இருந்தால், உங்கள் வீட்டில் இனி பண மழை கொட்டுவதற்கான காலம் கனிந்துவிட்டது என்றே சொல்லலாம்.

Click here for latest employment news

 Click here to join WhatsApp group for Daily employment news

Read More

சொந்தமாக தொழில் தொடங்க திட்டமா? குறைந்த முதலீட்டில் ஸ்மார்ட் பிசினஸ் ஐடியா..!

சொந்தமாக தொழில் தொடங்க வேண்டுமென்று எல்லாருடைய மனதிலும் ஒரு கனவு இருக்கும். ஆனால், பலராலும் அதை நிறைவேற்ற முடியாது. நாம் தொழில் செய்தால் லாபம் ஈட்டமுடியுமா என சிலர் தயங்குவார்கள். அதனால்தான் உங்களுக்கு பிடித்த, உங்களுக்கு தெரிந்த, உங்களுக்கு ஆர்வம் இருக்கும் தொழிலில் ஈடுபடுங்கள் என்று கூறுகிறோம். உங்களுக்கு நன்றாக சமைக்க வருமென்றால், டிபன் சேவை தொழில் உங்களுக்கு சிறந்த லாபத்தை தரக்கூடியதாக இருக்கும். இதற்கு குறைவான முதலீடே தேவைப்படும். வீட்டிலிருந்தே கூட இந்த தொழிலை வெற்றிகரமாக நடத்தலாம்.

டிபன் சேவை என்றால் என்ன?

இதுவொன்றும் பெரிய சிக்கலான தொழில் அல்ல; மிகவும் எளிமையான தொழில்தான். வீட்டைவிட்டு வெளியூரில் வசிப்பவர்களுக்கு, தனியாக தங்கியிருந்து வேலை பார்ப்பவர்களுக்கும் சுவையான, சத்தான, பிரெஷான உணவை நீங்கள் வழங்கலாம். பெரும்பாலும் வேலைக்குச் செல்பவர்களும் மாணவர்களும் தான் உங்களின் வாடிக்கையாளர்களாக இருப்பார்கள். உங்கள் டிபன் தொழில் வெற்றிகரமாக செல்ல வேண்டுமென்றால், சத்தான வீட்டுச் சமையலை நீங்கள் கொடுக்க வேண்டியது அவசியம்.

எப்படி தொடங்குவது?

உங்கள் வீட்டிலிருந்தே டிபன் சேவை அல்லது டப்பாவாலா தொழிலை தொடங்க விரும்பினால், சமைப்பதற்கும் டிபன்களை மொத்தமாக அடுக்கி வைப்பதற்கும் போதுமான இடவசதி இருக்க வேண்டும். சாதாரணமாக நம் வீட்டு சமையலறையில் 20 முதல் 30 பேருக்கு உண்டான உணவுகளை தயார் செய்யலாம். நாளடைவில் உங்கள் வாடிக்கையாளர்களின் எண்ணிக்கை 40-க்கும் மேல் இருந்தால், உங்கள் வீட்டிற்கு அருகாமையிலேயே ஒரு இடத்தை வாடகைக்கு எடுக்க வேண்டும்.

மார்கெட்டிங்:

டப்பாவாலா அல்லது டிபன் சேவை தொழில்கள் வாய்வழி விளம்பரத்தின் மூலம்தான் பெரும்பாலும் பிரபலமடையும். உங்கள் உணவைப் பற்றி மக்கள் நல்லவிதமாக கூறினால், உங்களுக்கு வாடிக்கையாளர்கள் எண்ணிக்கை அதிகரிக்கும். உங்கள் தொழில் குறித்து சமூக ஊடகத்திலும் விளம்பரம் செய்யலாம். உள்ளூர் அளவில் இருக்கும் சிறிய தொழில்களுக்கு இது மிகவும் உதவியாக இருக்கும்.

உங்கள் டிபன் சேவை தொழிலுக்கென்று தனியாக வலைதளம் தொடங்கலாம். அல்லது, உங்கள் உணவின் புகைபடங்களை இன்ஸ்டாகிராம் அல்லது ஃபேஸ்புக்கில் பதிவிடலாம். இதனால் உங்களின் டிபன் தொழில் குறித்து பலருக்கும் தெரிய வரும். கூகுளில் விளம்பரங்கள் செய்வதாலும் உங்கள் தொழில் பெருகும். இன்றைய காலத்தில் பெண்கள் மட்டுமல்லாமல், ஆண்களும் கூட இந்த டிபன் சேவை தொழிலை திறம்பட நடத்தி வருகிறார்கள்.

முதலீடு:.

வழக்கமான சாப்பாடு என்பது கொஞ்சம் சாதம், சப்பாத்தி, கொஞ்சம் பருப்பு கடையல், கொஞ்சம் கூட்டு சில சமயங்களில் சாலட். இதைதான் நீங்கள் டிபனில் கொடுக்கப் போகிறீர்கள். செலவை கணக்கிடுவதற்கு முன்பு இதை நன்றாக தெரிந்து வைத்துக் கொள்ளுங்கள். ஆரம்ப முதலீடுகளுக்கும் அதற்குப் பிறகான பணத் தேவைகளுக்கும் உங்கள் கைகளில் இருந்துதான் செலவழிக்க வேண்டியிருக்கும். சமையல் பாத்திரங்கள், அடுப்புகள் மற்றும் பிற பொருட்கள் வாங்க எப்படியும் தோராயமாக ரூ.20,000 முதல் ரூ.30,000 வரை செலவாகும். வாடிக்கையாளர்கள் அதிகமானால் உங்களுக்கு வரக்கூடிய வருமானமும் அதிகரிக்கும்.

உணவு மற்றும் பாதுகாப்பு உரிமம்:

உங்கள் டிபன் தொழில் நல்லபடியாக சென்று கொண்டிருந்தால் தான், இந்திய உணவு பாதுகாப்பு மற்றும் தரப்படுத்தல் ஆணையம்(FSSAI) உங்களுக்கு உணவு மற்றும் பாதுகாப்பு உரிமத்தை வழங்கும். எனினும், வருடத்திற்கு ரூ.12 லட்சம் அல்லது அதற்கு மேலும் வருமானம் ஈட்டக் கூடிய நிறுவனங்களுக்கு மட்டுமே இந்த உரிமம் தேவைப்படும்.

Click here for latest employment news

 Click here to join WhatsApp group for Daily employment news

Read More

அதிக தன்னம்பிக்கை கொண்ட பெண்கள் இப்படிதான் இருப்பார்கள்..!

 சமூகத்தில் ஒரு சிலர் மிகவும் தனித்துவமாக, நேர்த்தியாக, பார்க்கும் போதே அதிசயிக்கும் விதமாக இருப்பார்கள். இவர்களைப் போல இருக்க வேண்டும் என்று ஒரு சில பெண்களைப் பார்க்கும் போது ஒரு ரோல் மாடலைப் போலக் காண்பார்கள். இவ்வாறு தனித்துவமாக இருக்கும் பெண்களுக்கு என்று ஒரு சில பிரத்யேகமான பழக்கங்கள் மற்றும் குணங்கள் இருக்கின்றன. குறிப்பாக, அதிக தன்னம்பிக்கை கொண்ட பெண்களுக்கு இவை பொதுவானதாகக் காணப்படுகின்றன. அவ்வாறு தன்னம்பிக்கையுடன் வலம் வரும் பெண்களிடம் காணப்படும் பழக்கங்கள் பற்றி இங்கே பார்க்கலாம்.

தன்னைத் தானே அறிந்து கொள்வது : உங்களைச் சுற்றி இருப்பதை புரிந்து கொள்வது எவ்வளவு முக்கியமோ, உங்களைப் புரிந்து கொள்வதும் அதே அளவுக்கு முக்கியம். நீங்கள் எதைப் பற்றி அதிகம் சிந்திக்கிறீர்கள், உங்கள் உணர்வுகள், உணர்ச்சிகள் ஆகியவற்றைப் பற்றி ஒரு எழுதலாம். அல்லது உங்களின் ஏற்ற இறக்கமான உணர்வுகளை பற்றி உங்களுக்கு நெருக்கமானவர்களிடம் பகிரலாம். இதன் மூலம் உங்களைப் பற்றி நீங்கள் நன்றாக புரிந்து கொள்ள உதவும். தன்னுடைய பலவீனங்களை அறிந்தவர்களுக்கு தன்னம்பிக்கை குறையாது.

பாசிடிவ்வாக நினைப்பது : எப்போதுமே நேர்மறையான உணர்வுகள், சிந்தனைகள் தோன்றாது. பாசிட்டிவ் மற்றும் நெகட்டிவ் எண்ணங்கள் நாணயத்தின் இரு பக்கம் போன்றது. ஆனால் அதிக தன்னம்பிக்கைக் கொண்ட பெண்களைப் பார்க்கும் போது, அவர்கள் சவாலான, சிக்கலான சூழ்நிலைகளைக் கூட, அதை எதிர்கொள்வது எப்படி என்று நேர்மறையாக சிந்திப்பார்கள்.

இலக்குகளை நிர்ணயித்து அதை அடைவார்கள் : பொதுவாகவே வாழ்வில் முன்னேறுவதற்கு நமக்கு என்று தனிப்பட்ட இலக்குகள் மற்றும் லட்சியங்கள் இருக்க வேண்டும். இலக்குகள் இல்லாமல் தோன்றியதையெல்லாம் செய்து கொண்டிருந்தால் ஒரு கட்டத்தில் குழப்பம் ஏற்படும். தன்னம்பிக்கை அதிகமாக இருக்கும் பெண்கள் சின்ன சின்னதாக இலக்குகளை நிர்ணயித்து அதை ஒவ்வொன்றாக அடைந்து நிதானமாக முன்னேறிச் செல்வார்கள். இதன் மூலம், மிகப்பெரிய விஷயங்களைக் கூட படிப்படியாக சாதிக்க முடியும்.

கனிவாக இருப்பார்கள், உதவி செய்ய தயங்க மாட்டார்கள் : தன்னம்பிக்கை அதிகரிப்பதற்கு நீங்கள் பொதுவாகவே அன்பாகவும் கனிவாகவும் இருக்க வேண்டும் மற்றும் மேலும் தயங்காமல் உங்களால் முடிந்த உதவியை மற்றவர்களுக்கு செய்ய வேண்டும். இந்த இரண்டு பழக்கமுமே உங்களுடைய தன்னம்பிக்கையை பெரிய அளவில் அதிகரிக்கும். ஸெல்ப் கான்பிடன்ஸ் அதிகமாக இருக்கும் பெண்களிடம் இதை கண்கூடாக பார்க்கலாம்.

நேர்த்தியான, பொருத்தமான ஆடை அணுவது : ஆள் பாதி ஆடை பாதி என்ற பழமொழிக்கு ஏற்ப அதிகமான தன்னம்பிக்கை என்பது ஒருவருடைய தோற்றத்தில் வெளிப்படும். அதில் நாம் எந்த ஆடைகளை தேர்ந்தெடுக்கிறோம் என்பது மிக மிக முக்கியம். தன்னம்பிக்கை நிறைந்த பெண்கள் தங்களுக்கு பொருத்தமான ஆடைகளை நேர்த்தியாக அணிவார்கள். இது டிரெண்டில் இருக்கிறது, இதுதான் இப்போது ஸ்டைல் என்று பொருத்தமில்லாத ஆடைகளை தேர்வு செய்ய மாட்டார்கள் என்பது குறிப்பிடத்தக்கது.

Read More

வீட்டிலேயே குறைந்த முதலீட்டில் அதிக லாபம்தரும் தொழில்கள்!

 

small business ideas :வேலையில்லா பட்டதாரிகள் தொடங்கி வேலையை ராஜினாமா செய்துவிட்டு பட்டதாரிகளுக்கு வேலை கொடுக்க திட்டமிடுபவர்கள் 50,000 முதலீட்டிலேயே தொடங்க கூடிய சிறுதொழில்கள் குறித்த விவரங்கள் இதோ!

உலகில் பொருளாதார மந்த நிலை வரலாம் என்ற அபாயம் பெரு நிறுவனங்களை வாட்டி எடுத்து வரும் நிலையில், ஆயிரக்கணக்காணோரை பணிநீக்கம் செய்யும் வேலைகளில் முன்னணி தொழில்நுட்ப நிறுவனங்கள் இறங்கிவிட்டது. மாதச்சம்பளம் வாங்கிக் கொண்டு கார்ப்பரேட் நிறுவனத்தில் வேலை செய்யும் பலருக்கும் சொந்தமாக தொழில் தொடங்க வேண்டும் என கனவு அதிகரித்துள்ளது. 

ஆன்லைன் பயிற்சி மையம்

வீட்டிலிருந்து பணிபுரியும் போது மற்றவர்களுக்கு உதவ உங்கள் திறன்களையும் அறிவையும் பயன்படுத்த ஆன்லைன் பயிற்சி மையம் அமைப்பது சிறந்த வழியாகும்.

நீங்கள் பயிற்சி அளிக்க விரும்பும் பாடம் அல்லது திறன்களை வகைப்படுத்தி, அதில் உங்கள் அனுபவம் மற்றும் தகுதிகள் பற்றிய தகவல்கள், உங்கள் சேவை குறித்த பழைய வாடிக்கையாளர்களின் கருத்துகள் உள்ளிட்டவற்றை கொண்ட இணையதளத்தை உருவாக்கவும்.

உங்கள் சேவைகளை மக்களுகு விளம்பரப்படுத்த சமூக ஊடக தளங்களைப் பயன்படுத்தவும், சமூக ஊடகங்களில் நீங்கள் பதிவிடப்போகும் புகைப்படம், வீடியோக்கள் வெறும் விளம்பரமாக மட்டுமின்றி அதில் அறிவுப்பூர்வமாக கற்ற வேண்டிய விஷயங்களை அதில் சேர்க்கும் போது பலரது வரவேற்பை பெறலாம். நல்ல இணைய சேவை, தரமான ஹெட்செட் மற்றும் வெப்கேமில் முதலீடு செய்யுங்கள். இட்யூட்டர், வேதாந்தா போன்ற ஆன்லைன் பயிற்சி சந்தைகளையும் நீங்கள் பயன்படுத்தலாம்.

இ-கார்மர்ஸ் ஸ்டோர்

ஆன்லைன் ஸ்டோரைத் தொடங்குவது பொருட்களை விற்பனை செய்வதற்கும் உங்கள் வீட்டில் இருந்தபடியே பணம் சம்பாதிப்பதற்கும் ஒரு சிறந்த வழியாகும். நீங்கள் விற்க விரும்பும் தயாரிப்புகளை அடையாளம் காணவும். இது ஆடைகள், நகைகள், கைவினைப்பொருட்கள், ஆர்கானிக் தேனீர், சப்ளிமெண்ட்ஸ் போன்ற முக்கிய பொருட்கள் விற்பனைக்கு ஏதுவாக இருக்கலாம். மற்ற ஆன்லைன் ஸ்டோர்கள் இதே போன்ற தயாரிப்புகளை விற்கின்றன மற்றும் அவை எவ்வாறு சிறப்பாக செயல்படுகின்றன என்பதை கவனிக்க தொடங்குங்கள்.

உங்கள் ஆன்லைன் ஸ்டோரை உருவாக்க மற்றும் ஹோஸ்ட் செய்ய Shopify, WooCommerce, Magento,Zoho உள்ளிட்ட இ-காமர்ஸ் தளங்கள் பல்வேறு சேவைகளை வழங்கி வருகின்றன. உங்கள் ஆன்லைன் கடையை உருவாக்குவதற்கும் நிர்வகிப்பதற்கும் பலதரப்பட்ட அம்சங்களையும் கருவிகளையும் வழங்குகின்றன. உங்கள் ஸ்டோரை விளம்பரப்படுத்த சமூக ஊடக தளங்களைப் பயன்படுத்தவும், உதவிக்குறிப்புகள் மற்றும் ஆதாரங்களைப் பகிர்ந்துகொள்ள ஒரு வலைப்பதிவை உருவாக்கவும் மற்றும் உங்கள் முக்கியத் தொடர்புடைய ஆன்லைன் சமூகங்களில் சேரவும்.

விரைவில் வாடிக்கையாளர்களை பெற வேண்டும் என்றால் அமேசான், ப்ளிப்கார்ட், மீஷோ போன்ற இ-கார்மஸ் தளங்களில் உங்கள் ஸ்டோரை இலவசமாக திறக்கலாம். உங்களுக்கு நடக்கும் விற்பனையை பொறுத்து கமிஷன் தொகையை பிடித்துக் கொண்டு வங்கிக்கணக்கில் பணத்தை போட்டுவிடுவார்கள். இந்த தளங்களில் வணிகம் செய்ய ஜிஎஸ்டி பதிவு செய்வது கட்டாயம்.

நீங்கள் விற்க விரும்பும் தயாரிப்புகளின் சப்ளையர்களைத் தேடுங்கள் மற்றும் விலை, குறைந்தபட்ச ஆர்டர் அளவுகள் மற்றும் ஷிப்பிங் நேரம் போன்ற விதிமுறைகளைப் பேச்சுவார்த்தை நடத்தவும்.

மின்னஞ்சல் மார்க்கெட்டிங், சமூக ஊடக விளம்பரம், கூகுள் விளம்பரங்கள் போன்ற பல்வேறு சந்தைப்படுத்தல் நுட்பங்களைப் பயன்படுத்தி உங்கள் கடையை விளம்பரப்படுத்தவும். ஆன்லைன் ஸ்டோரைத் தொடங்க சிறிது நேரம் மற்றும் முயற்சி எடுக்கலாம், ஆனால் சரியான அணுகுமுறையுடன், நீங்கள் வெற்றிகரமான மற்றும் பலனளிக்கும் வணிகத்தை உருவாக்கலாம்.

உணவு தயாரித்து டெலிவரி செய்தல்

சென்னை உள்ளிட்ட மெட்ரோ நகரங்கள் மற்றும் இரண்டாம் கட்ட நகரங்களில் வசிப்பவர்கள் உணவு தயாரித்து டெலிவரி செய்யும் சேவை மூலம் வருவாய் ஈட்ட முடியும். உணவு விநியோக வணிகத்தைத் தொடங்குவது, சமையலில் உங்கள் ஆர்வத்தை லாபகரமான முயற்சியாக மாற்றுவதற்கான சிறந்த வழியாகும். நீங்கள் தயாரித்து வழங்க திட்டமிட்டுள்ள உணவுகளின் மெனுவை உருவாக்கவும். தொடங்குவதற்கு ஒரு குறிப்பிட்ட உணவு அல்லது உணவு வகைகளில் கவனம் செலுத்துவது சிறந்தது.

முதலில் உணவு விநியோகத்திற்காக FSSAI உள்ளிட்ட உரிமங்கள் மற்றும் அனுமதிகளைப் பெறுங்கள். குளிர்சாதனப் பெட்டி, அடுப்பு, பாத்திரங்கள் மற்றும் பேக்கேஜிங் பொருட்கள் போன்ற தேவையான சமையலறை உபகரணங்களில் முதலீடு செய்யுங்கள். இணையதளம் மற்றும் சமூக ஊடக கணக்கை உருவாக்கி அதில் உங்கள் மெனு, விலை மற்றும் டெலிவரி தகவலை பதிவிடவும்.

UberEats, Swiggy, Zomato போன்ற டெலிவரி சேவையுடன் கூட்டுசேர்வதோ அல்லது உங்கள் சொந்த டெலிவரி டிரைவர்களை நியமிப்பதன் மூலமாகவோ விரைவாக வாடியாக்கையாளர்களுக்கு உணவு டெலிவரியை செய்ய முடியும். சோஷியல் மீடியா இன்புளூயன்சர்களை உங்கள் உணவை ஆர்டர் செய்து ரிவ்யூ செய்ய வைத்து சமூக ஊடகங்களில் வீடியோக்களை பதிவேற்றுவதன் மூலம் நிறைய வாடிக்கையாளர்களை பெற முடியும்.

ஆனால் உங்கள் உணவின் தரம், சுவை, விலை, டெலிவரி நேரத்தை பொறுத்தே மீண்டும் மீண்டும் வாடிக்கையாளர்கள் உங்கள் உணவை வாங்க முடிவு செய்வார்கள் என்பதை கவனத்தில் கொள்க. தொடர்ந்து உங்கள் சமையல் திறன்களை மேம்படுத்தவும், மேலும் உங்கள் மெனுவை புதியதாகவும் சுவாரஸ்யமாகவும் வைத்திருக்க புதிய சமையல் வகைகள் மற்றும் உணவுகளை பரிசோதித்துக்கொண்டே இருங்கள். உணவு விநியோக வணிகத்தைத் தொடங்குவதற்கு சிறிது நேரம் மற்றும் முயற்சி எடுக்கலாம்.

கிராபிஃக்ஸ் டிசைனிங்

கிராஃபிக் டிசைன் என்பது லோகோக்கள், பிரசுரங்கள், இணையதளங்கள் மற்றும் தகவல் மற்றும் யோசனைகளை வெளிப்படுத்தும் படைப்புத் துறையாகும். ஒரு வெற்றிகரமான கிராஃபிக் டிசைனராக அடோப் இல்லஸ்ட்ரேட்டர், போட்டோஷாப், இன்டிசைன் போன்ற கிராஃபிக் டிசைன் உள்ளிட்ட மென்பொருட்களில் தேர்ச்சி பெறுவது அவசியம்.

நீங்கள் உருவாக்கும் படைப்புகளின் உணர்ச்சிகளை வெளிப்படுத்த நிறக்கோட்பாடு குறித்து நிச்சயம் தெரிந்து கொண்டே ஆக வேண்டும். ஒரு கிராஃபிக் வடிவமைப்பு வணிகத்தைத் தொடங்குவதற்கு நேரம், முயற்சி மற்றும் அர்ப்பணிப்பு தேவைப்படுகிறது, ஆனால் சரியான திறன்கள் மற்றும் அணுகுமுறையுடன், நீங்கள் வெற்றிகரமான மற்றும் பலனளிக்கும் வணிகத்தை உருவாக்க முடியும்.

 Click here for latest employment news

 Click here to join WhatsApp group for Daily employment news

Read More

வயது வரம்பு இல்லை... கல்வி தகுதியும் தேவையில்லை... புதிய தொழில் முனைவோர்களுக்கு அசத்தல் வாய்ப்பு

 ஆர்வமுள்ள எஸ்சி/எஸ்டி தொழில் முனைவோர்கள் தமிழ்நாடு அரசின், 'அண்ணல் அம்பேத்கர் தொழில் முன்னோடிகள் திட்டம்' திட்டத்தின் கீழ் விண்ணப்பித்து பயனடையலாம் என்று சென்னை மாவட்ட ஆட்சித் தலைவர் தெரிவித்துள்ளார்.

இதுகுறித்து, அவர் வெளியிட்ட செய்திக் குறிப்பில் கூறியிருப்பதாவது:-

தமிழ்நாடு அரசு, குறு, சிறு மற்றும் நடுத்தர நிறுவனங்கள் துறை சார்பாக ஆதிதிராவிடர் மற்றும் பழங்குடியினர்(SC/ST) தொழில்முனைவோர்கள் பொருளாதார வளர்ச்சியை ஊக்குவிக்கும் வகையில் பிரத்யோக சிறப்பு திட்டமாக ’அண்ணல் அம்பேத்கர் தொழில் முன்னோடிகள் திட்டம்’ செயல்படுத்தபடவுள்ளது.

இத்திட்டத்தின் கீழ் ஆர்வமுள்ள புதிய தொழில் முனைவோர்களுக்கு உற்பத்தி, வணிகம், சேவை சார்ந்த அனைத்து வித தொழில் திட்டத்திற்கும் மற்றும் வணிக விரிவாக்கத்திற்கும் கடனுதவியோடு இணைந்த மானியம் வழங்கப்படவுள்ளது.

இத்திட்டத்தின் கீழ், பயன்பெற விண்ணப்பதாரர்களுக்கு வயது வரம்பு இல்லை மற்றும் கல்வி தகுதியும் தேவையில்லை. மொத்ததிட்ட மதிப்பில் 65% வங்கி கடனாக ஏற்பாடு செய்யப்பட்டு 35% அரசின் பங்காக மானியம் வழங்கப்படும். எனவே, பயனாளிகளுக்கு தம் பங்காக நிதிசெலுத்தவேண்டிய தேவை இருக்காது. இத்திட்டத்தில் 8% வட்டி மானியமும் வழங்கப்படும்.

மேலும், ஆர்வமுள்ள ஆதிதிராவிடர் பழங்குடியினர் (SC/ST) பிரிவு  தொழில்முனைவோர்களுக்கு தேவையான ஆலோசனைகள் வழிகாட்டுதல், திட்ட அறிக்கை தயாரித்தல், விண்ணப்பித்தல் தொடர்பான அனைத்துவித உதவிகளும் அளிக்கப்படுவதுடன் தொழில்முனைவோர் மேம்பாட்டு பயிற்சி மற்றும் திட்டம் சார்ந்த சிறப்பு பயிற்சி இலவசமாக வழங்கப்படும்.

இத்திட்டம் தொடர்பான விழிப்புணர்வு கூட்டம் சென்னை மாவட்டஆட்சியர் அலுவலகத்திலுள்ள கூட்ட அரங்கில்  வருகிற 23.05.2023  (நாளை) அன்று பிற்பகல் 3 மணியளவில் நடைபெறவுள்ளது. ஆர்வமுள்ள எஸ்.சி மற்றும் எஸ்டி (SCIST) பிரிவு தொழில்முனைவோர்கள் இக் கூட்டத்தில் பங்கேற்று பயன்பெறலாம்.

இத்திட்டத்தின் கீழ் பயன் பெற திட்ட அறிக்கை மற்றும் ஆவணங்களுடன் www.msmeonline.tn.gov.in என்ற இணையதள வழியாக விண்ணப்பிக்கலாம்.

இத்திட்டம் பற்றிய கூடுதல் விவரங்கள் மற்றும் விண்ணப்பிப்பதற்கான வழிகாட்டுதல்கள் பெற A-30,சிட்கோ தொழிற்பேட்டை, கிண்டி, சென்னை-32 என்ற முகவரியில் அமைந்த தொழில் மற்றும் வணிக மண்டல இணை இயக்குநர் அலுவலகத்தினை நேரடியாகவோ அல்லது 90030 84476, 94441 14723 ஆகிய எண்களில் தொலைபேசி வழியாகவோ அணுகுமாறு கேட்டுக் கொள்ளப்படுகிறது.

 Click here for latest employment news

 Click here to join WhatsApp group for Daily employment news

Read More